தீ விபத்து தகவல் கிடைத்த உடனே பல தீயணைப்பு வாகனங்கள் சம்பவ இடத்துக்கு சென்று மீட்பு நடவடிக்கைகளை தொடங்கின. அதிகாலை வரை நடைபெற்ற மீட்பில், குறிப்பாக சமையலறை பகுதியில் இருந்து பல உடல்கள் மீட்கப்பட்டன.
இந்தியாவின் பிரபலமான சுற்றுலா மாநிலமான கோவாவின் வட பகுதி அர்போரா கிராமத்தில் உள்ள ஒரு புகழ்பெற்ற நைட் கிளப்பில், நேற்று நள்ளிரவில் ஏற்பட்ட தீ விபத்தில் குறைந்தது 23 பேர் உயிரிழந்தனர். வட கோவாவின் பிரபல பாகா கடற்கரைக்கு அருகில் அமைந்த ‘Birch by Romeo Lane’ கிளப்பில் நடுநிசியில் சுமார் 12:04 மணிக்கு தீ பற்றிய தகவல் போலீசாரிடம் கிடைத்தது.
சிலிண்டர் வெடிப்பு காரணமா?
முதற்கட்ட விசாரணையில் கிளப்பின் சமையலறையில் கேஸ் சிலிண்டர் வெடித்ததே தீ விபத்துக்குக் காரணமாக இருந்திருக்கலாம் என்று அதிகாரிகள் சந்தேகிக்கின்றனர்.
உயிரிழந்தவர்களில் பெரும்பாலோர் அந்த கிளப்பில் வேலை செய்த ஊழியர்களே. இவர்களில் 3 பெண்கள், 20 ஆண்கள் ஆகியோர் அடங்குவர். மேலும், 3–4 பேர் சுற்றுலாப் பயணிகள் இருக்கலாம் என்று முதலமைச்சர் பிரமோத் சாவந்த் கூறினார். மரணமடைந்த 23 பேரில் 3 பேர் தீக்காயத்தால், மற்றவர்கள் புகை மூட்டத்தால் மூச்சுத் திணறி இறந்தது தெரியவந்துள்ளது.
மீட்பு பணிகள்:
தகவல் வந்தவுடன் பல தீயணைப்பு படையினர் சம்பவ இடத்துக்கு விரைந்து, தீயை கட்டுக்குள் கொண்டுவர பணியாற்றினர். சமையலறை பகுதியிலேயே தீ அதிகமாக பரவியிருந்தது. கோவா டிஜிபி அலோக் குமார் மற்றும் வட கோவா போலீஸ் அதிகாரிகள் உடனடியாக சம்பவ இடத்துக்கு சென்று ஆய்வு செய்தனர்.
டிஜிபி அலோக் குமார் தெரிவித்ததாவது: தீ முழுமையாக கட்டுப்படுத்தப்பட்டுள்ளது; தீ விபத்துக்கான துல்லியமான காரணம் இன்னும் உறுதி செய்யப்படவில்லை; முழுமையான விசாரணை மேற்கொள்ளப்படும்.
முதலமைச்சர் பிரமோத் சாவந்தும் சம்பவ இடத்தை பார்வையிட்டு, இந்த துயரச் சம்பவம் தொடர்பாக கடுமையான விசாரணை நடைபெறும் என்றும், சட்டவிரோதமாக இயங்கும் நிறுவனங்கள் மற்றும் பாதுகாப்பு குறைபாடுகளைப் புறக்கணித்தவர்களுக்கு எதிராக கடுமையான நடவடிக்கை எடுக்கப்படும் என்றும் உறுதியளித்தார்.
Leave a Reply